قبل ما اعرف اي حاجة عن نظام ال Minimalist.
كان عندي دايما مشكلة في بيت أهلي, عندنا حاجات كتييييييير , بكره يوم التنضيف بسببها. أرفف مليانة, دواليب مليانة, و جدتي مش بتحب حد يغير حاجة في بيتها, بس بسبب المعاناه دي قررت اني يوم ما يبقى عندي بيت ليا حرية الإختيار فيه, مش هاجيب غير الي هستخدمه.
و قد كان
اتجوزت نوفمبر ٢٠١٣, و علشان جوزي مش عايش في مصر فقررنا نفرش البيت الي موجود بحيث نقدر نعيش فيه لو نزلنا أجازة أو لأي سبب و في نفس الوقت مش هنفرش غير الي محتاجينه, النتيجة اني قفلت حجرتين تماما مش مفروشين.
مافيش نيش, مافيش دولاب فضيات, مافيش صالون, مش عندنا مبدأ ان في حاجة لينا و حاجة للضيوف, ففرشنا البيت كله على الأساس دة.
لما قريت عن ال Minimalist
افتكرت الوقت الي كنت بفرش فيه البيت, و افتكرت اني لا شعوريا من غير ما أعرف عملت حاجات من المبادئ دي سهلت عليا كتير, و يمكن دة كان من الأسباب الي علشانها قررت أكمل.
و يمكن علشان كنت مسافرة على ستوديو مؤقتا لحد ما نقرر هنعيش فين بالظبط, و يمكن علشان احساسي اني بسيب أجزاء مني و انا مسافرة و سايبه أغلب حاجتي الي ملهاش مكان و مش هقدر آخدها قررت اني مش هعمل كدة في نفسي تاني.
لما بقرا على الفيس بوك استفسارات بنات بتسأل أجيب كام طقم حلل و كام طقم صيني, و هل ٤٠ طقم سرير كفاية, و الفوط انا جبت ٦٠, بيجيلي هلع.
بفتكر مرة واحدة فرشت بيت صاحبتي كانت بتتجوز و برغم ان بيتها مش كبير الا انهعلى آخر اليوم كان مليان كراتين تحت السرير و فوق الدولاب و حاجات فوق بعض فوق بعض.
بيت عروسة المفروض لسه بيتفرش بقى عبارة عن مخزن كراكيب.
الناس بتتداين و بتدخل السجن بسبب الديون من تجهيزات الزواج المفرطة الي مالهاش أي فايدة عملية غير ان الناس متاكلش وشنا.
انا اتجوزت و وشي زي ما هوة الحمد لله ماحدش أكله
الفكرة الي محتاجة تتغير ان البيت بيت الي هيسكنو فيه, و هيعيشو فيه, المفروض يكون مناسب احتياجاتهم و يكون مريح بالنسبة ليهم, مش بيتعمل معرض علشان الناس تيجي تتفرج ساعتين و تمشي.
و أصحاب البيت يعيشو مخنوقين بسبب الديون و بسبب الكراكيب.
خليكو عمليين و انتو بتفرشو بيوتكو, و افتكرو كويس جدا ان بيتكو راحتكو مش راحة الناس, و كدة كدة الناس هتتريق و هتتكلم, فيتريقو و يتكلمو و انا مرتاحة أفضل ما يتريقو و يتكلمو و انا مش مرتاحة.
No comments:
Post a Comment