مبدئيا كلمة Minimalist تعني الحد الأدنى من المتطلبات.
Minimalist Lifestyle: هوة أسلوب الحياة بالحد الأدنى من المتطلبات.
بمعنى الحياة بالأساسيات فقط.
طبعا كلمة الأساسيات فقط مختلفة من شخص للتاني ,لأنها بتختلف من احتياجات كل شخص للآخر, و لكن لو هنتكلم في المجمل فهنقول ان بنطلون اسود واحد بيغني عن عشرة بنطلونات سودا, قميصين فورمال لونهم أبيض هيقضو نفس الغرض الي هيقضيه عشر قمصان بيض الاختلافات بينهم تكاد تكون غير ملحوظة و هكذا.
لو هتكلم عن نفسي انا عندي هوس بالمكياج, بالذات الروج, و ألوان الروج بتاعتي تقريبا كلها واحد بالنسبه للي بيشوفني حطاهم, محدش بيفرق الدرجات غيري لأني عارفاهم, فدرجتين روج عندي هيغنو عن تقريبا من ١٠ ل ١٥ درجة.
دة بأبسط شرح معنى ال Minimalist
الفكرة مش ان يكون عندك حاجات قليله و تستغنى عن حاجات محتاجها, او تبقى مضايق او حاسس ان ناقصك حاجات كانت ممكن تسهل عليك حياتك, الفكرة انك تحتفظ بالي يدي قيمة لحياتك, و تستغنى عن الي بياخد منك وقت و طاقه و مجهود و فلوس و في الاخر مش بيديك قيمة, و لو ادالك هتكون قيمة نفسيه لمجرد ان عندك كذا.
زي بالظبط الناس الي عندها هوس شرا للبراندات, هدفهم الوحدي من اقتناء البراند قيمة نفسيه ان عندهم كذا مش موجود عند أصحابهم, او لأنهم بيعيشو مع ناس بتقيم الأشخاص ببرانداتها, و دة عمليا مش صح و ماينفعش نخليه يتحكم في حياتنا.
Minimalist Lifestyle بيشجع جدا اننا نوفر وقت و مجهود و فلوس , و أعرف أفرق كويس جدا ما بين الحاجة الي بتدي قيمة لحياتي و الحاجة الي بتحتاج مني وقت و طاقة و مجهود و فلوس زيادة و مش بتعود عليا بفايدة, يمكن يتكون فايدتها الوحيدة فايدة نفسيه او معنويه لحظتها و بتنتهي, إني اعرف افرق كويس ما بين انا (محتاج) ايه و (عاوز) ايه.
الحاجات الي بحتاجها بتكون حاجات مافيش امكانية الاستغناء عنها, بمعنى اننا بنحتاج ناكل و نشرب, بنحتاج نلبس أحذية و بنحتاج لبس تقيل في الشتا و هكذا.
الحاجات الي بنعوزها أحيانا و في أغلب الأوقات بيكون ممكن نستبدلها ببدائل متعددة الاستخدامات, او بحاجات عندنا أصلا, او عاوزينها لمجرد الاقتناء, او كنوع من الرفاهيه و خلافه.
الفكرة اننا نحاول نعيش ببساطة قد ما نقدر بشكل مادي و معنوي, و البساطة هنا مش معناها زهد او تقشف, معناها نعيش حسب حاجاتنا, يكون عندنا نوع من الصراحة مع النفس , و نستبعد تماما مبدأ يمكن أحتاجه, لما نحتاجه نبقى نشتريه عادي, الحياة بالأسلوب دة بتسهل حياتنا ماديا و معنويا بنسبه كبيرة, بتقلل الفوضى الي حوالينا و تخلينا نركز على المهم في حياتنا, بتخلينا نستمتع بالحاجات المادية في حياتنا بنسبه أكبر, لأننا في الغالب بنشتري و نكدس حاجات حوالينا من غير ما نستفيد منها بشكل كبير.
دة مبدئيا فكرة عامة عن مبدأ ال Minimalist .
في التدوينات الجاية هتكلم عن ازاي نطبقه في مختلف مجالات حياتنا, و عن تجربتي الشخصية في تحويل حياتي تماما للنظام دة, و الفايدة الي لقيتها بعد تطبيقه, و المساوئ بتاعته لو لقيت ليه مساوئ.
No comments:
Post a Comment